Cunha semana promocional que comeza o luns 28 de outubro ata o 3 de novembro.
- O Alcalde da Cañiza Luis Piña, presentou esta mañá a nova tempada dos cocidos cañicenses, acompañado do Presidente da Cámara Municipal de Melgaço, Manoel Batista e do Alcalde de O Carballiño Francisco Fumega .
- A hostelería da Cañiza xa está preparada para servir dende o luns 28 de outubro o “COCIDO”, o prato máis senlleiro da tradición gastronómica cañicense e un activo culinario que se suma aos moitos atractivos turísticos da Cañiza.
- Un menú que se pode saborear durante todo o ano nos restaurantes da Cañiza e especialmente na época dos fríos. Na presentación o Alcalde resaltou a necesidade de reservar nos restaurantes adheridos a esta semana promocional para garantir mesa: Os do Resero , Area CID , Casa Eligio, Bar Pirri- ELI, Bar Piri Piri , Casa Arela, restaurante Eido do Monte e Pincho da Avoa.
- En todos eles, os comensais participarán no sorteo de 30 noites de hotel para 2 persoas nas casas de hospedaxe do noso Concello. Cada menú inclúe unha rifa para este sorteo que se celebrará o vindeiro 11 de novembro. Ésta é a aportación económica que o Concello quere facer nesta V edición para promocionar a tempada.
- Con esta iniciativa queremos animar a visitar A Cañiza e a coñecer a nosa gastronomía e os nosos activos turísticos, principalmente as nosas rutas de sendeirismo que no outono alcanzan un alto valor paisaxístico.
Con estas palabras o Alcalde da Cañiza comezou a presentación da V Edición dos Cocidos Cañicenses. Citas obrigadas coa gastronomía de inverno da Cañiza promovida, impulsada e organizada conxuntamente polo concello e polos hostaleiros locais que comeza con forza a partires do 28 de outubro.
Carballiño, A Cañiza e Melgaço, un mesmo territorio unido pola gastronomía e a cooperación institucional en favor d@s veciñ@s
Despois da benvida e agradecementos, Luis Piña convidou aos seus invitados a participar na presentación gastronómica dando a palabra ao Alcalde de O Carballiño, Paco Fumega, quen volveu hoxe A Cañiza tras presentar este luns, xunto cos Alcaldes de Mondariz, Mondariz Balneario, Maside, Melón e o Alcalde Luis Piña, a concesión dunha subvención por parte do MITECO de case 5 millóns de euros para o PERTE da AUGA que permitirá mellorar as traídas de augas dos 6 concellos.
O Alcalde volveu a recordar as semellanzas entre A Cañiza e o Carballiño. Concellos que apostaron hai 60 anos pola gastronomía, tendo o acerto de traballar para impulsar o turismo gastronómico coas festas do Pulpo e do Xamón, ambas celebradas na 1ª quincena do mes de agosto. Agora volven a traballar xuntos a nivel institucional fortalecéndose entre os dous co desenvolvemento de importantes actuacións en beneficio dos veciños e veciñas de ambas localidades.
Tras a súa intervención, o Presidente da Cámara de Melgaço, Manoel Batista, agradeceu un ano máis a invitación do Alcalde para presentar esta nova arrancada gastronómica e fixo referencia igualmente as relacións e cooperación institucional que unen A Cañiza con Melgaço, nesta ocasión con motivo da Eurocidade que está a punto de constituirse e que permitirá crear dinámicas e interaccións entre os territorios que a integran.
Na apertura desta nova tempada o Alcalde resaltou “a forza gastronómica que dende hai máis de medio século caracteriza á Cañiza. Un papel que ten un forte arraigo na cociña popular e os históricos cocidos con produtos do porco e da horta como ingredientes principais e que na nosa zona, sobre todo na época da postguerra, permitiu alimentar a moitas das nosas familias. Hoxe o Cocido cañicense é un referente como tamén o é o xamón que celebramos todos os 15 de agosto”.
O Alcalde rematou a presentación dando as grazas aos dous Alcaldes que nos acompañaron na xornada de hoxe. Unhas grazas extensivas tamén aos outros Concellos que forman parte do PERTE da Auga e tamén da futura EUROCIDADE polos moitos lazos que nestes momentos estamos tecendo para fortalecer aos municipios.
«O tempo de frío é tempo de cocido»
Son moitos os padais que xa coñecen o cocido cañicense, pero promovido polo Concello, os hostaleiros da Cañiza organizan esta nova tempada, esmerándose en cociñar este prato tradicional preparado con chourizo de cebola e de carne, fuciño, rabo, orella, cacheira, lacón, touciño e costela de porco completado con pito, carne de vacún, patacas, fabas, garavanzos, cenorias e verdura ou repolo. Todo iso acompañado con pan rústico e pan de millo ou “Bica” e regado polos extraordinarios caldos brancos e tintos, a gusto do cliente, da denominación de orixe Rías Baixas, tamén da Cañiza, das adegas Eido da Fonte, Abelán e Cavadas do Val.
Antes ou despois deste prato ofrecerase un caldo servido en tazón. E como en toda boa comida, non pode faltar a sobremesa. Arroz con leite ou leite frita e café.
Para rematar o Alcalde agradeceu a implicación dos restaurantes e das adegas que están traballando xa para que esta nova tempada poida saldarse con éxito, calidade e participación e anunciou os restaurantes nos que xa se pode degustar este menú.
O Concello recomenda chamar por teléfono para reservar.
Os prezos non están unificados xa que cada local ofrece variantes e formas distintas de servilo.
Establecementos hostaleiros para degustar o Cocido
- Os do Resero 986652431
- Area CID 986652369
- Eligio 986651047
- Pirri- ELI 986156247
- Piri Piri 609325332
- Restaurante Arela 608727766
- Eido do Monte 607812201
- Chiringuito da Avoa 986651399
- Finca Briabí 684230928
- Casa Xatomé 886216744
