- Na que participaron máis de 250 palilleiras e palilleiros de 23 asociacións de toda a provincia de Pontevedra.
- O Alcalde Luis Piña felicitou á organización polo éxito de participación e de visitas durante unha xornada na que o bo tempo axudou a que o certame se saldara con récord de asistencia.
- A Palillada de Amuruva é ademáis a única que se celebra nas Comarcas do Condado e da Paradanta.
Este domingo celebrouse no recinto da “Irmandade” de Valeixe a «II Palillada da Cañiza», organizada pola Asociación de Mulleres Rurais de Valeixe AMURUVA, coa colaboración do Concello e de establecementos e comercios da Cañiza.
Todo un éxito de organización, segundo manifestaron as 20 mulleres de AMURUVA que fixeron posible este evento e que tamén quixeron agradecer a participación das asociacións da provincia e a asistencia dos veciños da Cañiza.
Unha concentración na que participaron 267 mulleres e homes que amosaron os seus traballos e a súa maestría no arte do encaixe de bolillos.
A Palillada comezou ás 10 da mañá coa benvida da organización, seguida do saúda do Alcalde e a visita por todos os postos.
Ao remate desta visita, o Alcalde entregou un agasallo do Concello aos representantes de todas as asociacións participantes, ás que agradeceu a súa asistencia.
Luis Piña felicitou tamén ás organizadoras de AMURUVA polo éxito conseguido, especialmente ás alumnas e á profesora de encaixe de bolillos. Tamén agradeceu a colaboración prestada polo comercio local e polo grupo de Pandereteiras Santa Cristina de Valeixe que actuou durante esta xornada festiva.
A PALILLADA DE VALEIXE É A ÚNICA QUE SE CELEBRA NA COMARCA
Ademáis esta mostra é a única que se celebra no Condado e A Paradanta. Segundo manifestaron dende a organización “na actualidade nestas Comarcas non se celebra ningunha mostra de encaixe de bolillos, a excepción desta da Cañiza que celebrou a súa primeira edición na primavera de 2019”. "Hai uns anos celebrábase un evento similar no Concello de Salvaterra pero dende hai anos a Palillada de Valeixe é a única. De ahí a importancia de visibilizar este Arte que forma parte da Cultura Galega".
Grazas a todos por este novo éxito para A Cañiza.
Galería multimedia
