As Súas Maxestades de Oriente e a súa “espectacular” Comitiva de música, cor e fantasía, percorreron durante hora e media a rúa Progreso da Cañiza repartindo 300 quilos de caramelos.
O que máis destacou da xornada foron as caras de ilusión e alegría dos nenos e nenas e tamén dos nosos maiores ao saudar aos Magos de Oriente.
Tres carrozas reais con paxes e acompañantes entre zancudos, mariposas, osos, maniquís e cabalos xigantes luminosos, ademáis de bailaríns e patinadoras, membros todos eles da empresa cañicense “Hípica Celta”, compuxeron este ano o desfile desde o Rañadoiro o Auditorio da Casa de Cultura, onde foron recibidos con fogos de artificio a cargo da pirotecnia local de Santa Cristina de Valeixe.
No Auditorio, os Reis de Oriente fixeron a súa Recepción Real, saudando a tod@s @s nen@s e recibindo as súas cartas e desexos.
Antes da Cabalgata, as súas Maxestades e os seus paxes acompañados polo Alcalde percorreron todas as parroquias do noso Concello e saudaron aos nosos maiores na Residencia Nosa Señora do Rosario de Valeixe, no Centro Xeriátrico Santa Teresa da Cañiza e no Centro de Día Anxo.
O Alcalde agradeceu ás Súas Maxestades a visita, así como a colaboración da Policía Local e dos demais empregados do Concello nas súas labores de seguridade e acompañamento.
#ACañizaCabalgataReis2024
#ACañizaNadal20232024
Galería multimedia
