UNHA PROBA CICLOTURISTA DE 110 KM, CON PERCORRIDO POLAS TERRAS DO CONDADO PARADANTA E COA PRIMEIRA PARADA DE AVITUALLAMENTO E REAGRUPAMENTO NA PRAZA MAIOR DA CAÑIZA.
O ALCALDE FELICITOU UN ANO MAIS Á ORGANIZACIÓN, ASOCIACIÓN DEPORTIVA CULTURAL PLAN C, E Ao EX CORREDOR ALVARO PINO POLO ROTUNDO ÉXITO DESTA NOVA EDICIÓN.
Este domingo 22 de maio, celebrouse a 7ª edición desta marcha ciclodeportiva, de carácter non competitivo, organizada pola Asociación Deportiva Cultural Plan C, cun trazado de 110 km, dos cales 30 desenvolvéronse polas estradas do noso Municipio.
Un gran fondo cicloturista que percorreu as terras de 7 concellos (Ponteareas, Mondariz Balneario, Mondariz, Covelo, Cañiza, As Neves e Salvaterra), con tramos de 2.000 metros de desnivel acumulado.
O percorrido polo noso Municipio empezou subindo ao Alto de Moncelos (Petán), un dos 3 altos de montaña da Marcha con máis altitude (806 m).
Sobre as 11:30 h a marcha fixo a primeira parada na Praza Maior da Cañiza para o avituallamento. Durante máis de media hora concelleiros e traballadores do Concello xunto coa organización da proba, repartiron máis de 400 bocadillos do mellor xamón da Cañiza entre todos os ciclistas. Esta parada serviu tamén para que os deportistas puidesen reagruparse e evitar así a dispersión.
O roteiro continuou cara á parroquia das Achas, Parada e Luneda (onde estaba marcado o segundo alto de montaña con 777 metros de altitude) e finalmente pasaron pola Franqueira para continuar a marcha cara á Meta de Ponteareas.
Como xa declarou o Alcalde Luís Piña na presentación da edición deste ano, «o Concello volveu colaborar coa «Clásica» repartindo bocadillos do mellor xamón da Cañiza, en agradecemento aos organizadores por elixir o noso Concello para formar parte do trazado desta competición que xa é un referente no ciclismo autonómico»
O Alcalde aproveitou tamén a ocasión para agradecer a colaboración dos xamoneiros da Cañiza que doaron gratuitamente todo o xamón para esta proba. Xamonerías “Os do Resero”, “ Piri- Piri”, “ Kenia”, “Paradanta” e “Área de Servizo Repsol da Cañiza”.