O Concello da Cañiza presenta mañá o Programa CLARA

Este martes 5 de agosto ás 20:30 horas, no Salón de Plenos do Concello da Cañiza, terá lugar a presentación oficial do Programa CLARA, unha iniciativa dirixida ás mulleres e nenas da Cañiza e Covelo.

O Programa CLARA ofrece asistencia psicolóxica e xurídica gratuíta, privada e con cita previa, que estará dispoñible todos os xoves de 9:00 a 14:00 h. O inicio desta atención virá acompañado dunha charla inaugural sobre saúde mental e benestar emocional a cargo da psicóloga responsable do servizo.

Ao longo dos próximos meses, o programa incluirá accións formativas, obradoiros de benestar, actividades de orientación laboral con apoio tecnolóxico, e espazos de encontro e debate sobre igualdade, saúde e empoderamento feminino.

Un dos obxectivos principais é reducir a fenda dixital e apoiar a inserción laboral das mulleres mediante o uso da intelixencia artificial, así como promover a igualdade a través de actividades de sensibilización, formación e participación comunitaria.

Ademais, está prevista a creación dun grupo de traballo cos clubs deportivos da comarca para deseñar e implementar protocolos de prevención e actuación fronte ao acoso, que se comezará a artellar nas últimas semanas de agosto ou comezos de setembro.

Este programa está cofinanciado pola Unión Europea a través dos Fondos Europeos, e conta co apoio da Xunta de Galicia, o Concello da Cañiza e o Concello de Covelo.

 Para máis información ou cita previa: 606 118 853 / 687 227 495