O Alcalde Luis Piña e o Presidente da Deputación Luis López reuníronse en Pontevedra para tratar asuntos de relevancia para A CAÑIZA

Así o comunicou o Alcalde quen fixo unha valoración positiva e fructífera desta primeira xuntanza na que se trataron temas importantes para o desenvolvemento do noso Municipio, como a mellora das estradas provinciais que vertebran o noso territorio con especial mención á EP 5102 Achas- A Franqueira – Lamosa e a EP 5001 da Franqueira a Cebreiro.

• En relación a estas 2 estradas, Luis Piña informou ao Presidente da necesidade de mellorar o trazado dos entronques e asfaltado da circunvalación Cebreiro-Franqueira e tamén a rotonda á altura do alto da Franqueira no cruce da circunvalación ata a estrada interior. Ademáis o Alcalde solicitou de novo a mellora e traspaso ao Concello dun tramo nesta estrada interior.
• Seguindo na liña de mellora das estradas provinciais, o Alcalde manifestou a necesidade de construir beirarrúas entre o casco urbano e o lugar de A Igrexa en Achas, un paseo peonil entre a Ponte de Achas e Randufe e humanizar a rúa Botica.
• E pechou o capítulo de melloras viais coa solicitude de acondicionamento de beirarrúas peonís na estrada 5002 Cañiza – Arbo dentro da parroquia de Valeixe.

Nesta xuntanza, o Alcalde tamén tratou co Presidente da Deputación sobre a falta de recursos do Concello para poder conservar adecuadamente a rede de pistas e camiños municipais, sendo unha das máis grandes de toda a Provincia, cun territorio de 108 km2. Neste sentido Luis Piña solicitou a axuda da administración provincial para a limpeza de maleza, cunetas, bacheo e asfaltado.

Tamén se analizaron os problemas municipais relacionados co servizo de abastecemento de augas e saneamento, cuns costes de mantemento demasiado elevados para o noso Concello.

Outro dos temas que se abordaron nesta Xuntanza, e que o Alcalde calificou de especial interese para A Cañiza, foi o da posta en valor da Cidade Castrexa das Grades. Unha actuación ilusionante na que o Concello xa está traballando, buscando as fontes de financiación que permitirán realizar os estudos e prospecccións arqueolóxicas.

A financiación de competencias impropias do Concello e do GES (Grupo de Emerxencias) formaron parte tamén da axenda do día que rematou falando sobre os plans de emprego provinciais dos que se beneficia o Concello e os servizos que dan soporte xurídico ás administracións locais.

O Alcalde Luis Piña valorou positivamente esta primeira reunión co Presidente Provincial na que tivo a oportunidade de expor en primeira persoa os problemas que afectan ao noso Concello. “Un municipio cunha gran extensión territorial, gran diseminación poboacional e unha orografía moi accidentada que provoca que a prestación dos servizos públicos sexa cada vez máis difícil de manter”.