A Cañiza vive unha nova edición de éxito co seu ENTROIDO DE VERÁN

IV edición organizada polo Club Balonmán Cañiza, con apoio do Concello e a participación da Asociación de Comerciantes

Este sábado, A Cañiza volveu converterse nun auténtico centro de animación e diversión, con motivo da celebración do IV Entroido de Verán. A pesar das elevadas temperaturas, a cita reuniu a máis de medio millar de persoas disfrazadas, superando todas as expectativas de asistencia e consolidándose como un dos eventos máis esperados do verán.

Unha das propostas estrela foi, un ano máis, o concurso de disfraces, que repartiu 1.500 euros en premios. Ademais, recoñecéronse tamén os mellores espazos decorados do municipio, cun premio ao balcón mellor engalanado e ao escaparate máis orixinal. Unha explosión de imaxinación e creatividade que encheu as rúas da vila de música, humor e festa.

O día comezou xa pola mañá coa recepción oficial, onde o alcalde Luis Piña, acompañado por Marcos Éstevez, presidente do Club Balonmán Cañiza —entidade organizadora do Entroido de Verán—, deu a benvida aos veciños e visitantes. A continuación, o historiador local David Gesteira foi o encargado da lectura do pregón, dando o pistoletazo de saída ao Entroido ás 13:00 h. Mentres tanto, os máis cativos gozaban dos inchables e obradoiros infantís na Praza Maior.

A Charanga Imperiais puxo a nota musical á sesión vermú, animando os principais puntos do centro da vila. Xa pola tarde, ás 19:30 h, arrancou o desfile desde a rúa Botica, coas comparsas e disfraces individuais desbordando imaxinación polas rúas da Cañiza.